অথঃ ভৰপক নিশা সংবাদ

তোক কুন্তি বুলি ক’ব পৰা নাযায়
গান্ধাৰী নামেৰেও ত‍ই শোভা নেপাৱ
যদিওবা তোৰ আচলতেই সৃষ্টি হয় যুধিষ্ঠিৰ
তোৰ বুকুতেই কবিৰ কাপেৰে পেষণ ধৰে ময়ুৰে
অথবা জোনাকীৰ শেতেলীত মূৰ থৈ জিৰণি লয় যান্ত্ৰিকতাই
তোক কুন্তি বুলি ক’ব পৰা নাযায়

গান্ধাৰী নামেৰে নামাতো তোক
যদিওবা তোৰ বুকুতেই কৌৰৱৰ ভিৰত হেজাৰ দ্ৰৌপদীৰ হয় বস্ত্ৰহৰণ
ধনীৰ টকাৰে কেও হয় ধনী, ধনীক ধুখীয়া কৰি
অথবা ভোকাল নিশা এজাক মানুহ হৈ পৰে আদিম
গান্ধাৰী নামেৰেও নামাতো তোক

উজাগৰে যে চাই থাক ক’লা-বগাৰ নৃত্যনাটিকা
নাইবা এপাচি সপোনৰ জন্মান্ত
ত‍ই ব্ৰহ্মা নে শংকৰ ?
নে চাই মদৰ এটি কক্‌টেইল পেগ ??