মৃত বেলুন

উৰিব নোখোজা এটি বেলুন
চৰাই হোৱাৰ হেঁপাহ তাৰ আগৰপৰাই নাছিল
উৰি যায় এটি ৰঙচঙীয়া চৰাই
ৰঙলগা পাখীৰ নাচোন বতাহৰ দেওত
ভাঁহি পৰিছিল হেঁপাহসনা কেইটুকুৰামান সপোন
এৰিব নজনা এটি বেলুনে হাইড্ৰ্'জেন বিচাৰিলে
উৰি উৰি গৈ থাকিল চৰাই অভিমুখে
উচ্চতাৰ পৰা উচ্চতালৈ
উচ্চতাত বেলুনৰ লয়লাস নৃত্য
উচ্চতাৰ ওপৰত উৰি উৰি গৈ থাকিল চৰাই

ঢুকি পোৱাৰ ঠিক আগৰ এটি মুহূৰ্ত...
চৰাইৰ এটি খোঁটত উৰি গ'ল হাইড্ৰ্'জেন
পৰি ৰ'ল বেলুন
উৰিব নিবিচৰা এটি বেলুন উৰিব বিচাৰিছিল
উৰিব বিচৰা এটি বেলুন পৰি আছিল
উৰাব বিচৰা এটি চৰাই উৰি থাকিল
চৰাইটো ৰঙচুৱা আছিল
ৰঙবোৰ অভিনয় আৰু চৰাইটো মাংসহাৰী আছিল